Ás styrktarfélag starfar samkvæmt lögum um málefni fatlaðs fólks nr. 59/1992 með síðari breytingum og reglugerð nr. 1054/2010 um þjónustu við fatlað fólk á heimili sínu.

Ás styrktarfélag annast rekstur heimila í Reykjavík, Kópavogi og Hafnarfirði.

Á heimilum félagsins búa um 60 manns á aldrinum 19 - 79 ára.

Í þjónustu við fatlað fólk á heimili sínu er unnið út frá lögum og reglugerðum, ríkjandi hugmyndafræði auk þess sem tekin eru mið af gildum og framtíðarsýn Áss styrktarfélags.

Stefna félagsins er að leita nýrra leiða í búsetuúrræðum fyrir fólk með þroskahömlun. Félagið einsetur sér að vinna að þróunarstarfi og leita leiða til aukinna lífsgæða í samstarfi við íbúa og aðstandendur þeirra. Full þörf er á fjölbreyttum íbúðaúrræðum svo sem íbúðakjörnum, íbúðasambýlum og sjálfstæðri búsetu. Stefna félagsins í búsetumálum er nú í endurskoðun og mun sú útgáfa birtast á heimasíðunni þegar þeirri vinnu er lokið.

Lögð er áhersla á einstaklingsmiðaða þjónustu. Virðing fyrir einstaklingnum og sjálfræði hans skal vera leiðarljós í allri þjónustu. Horft er til þess að allir njóti ákveðinna lífsgæða, taki þátt í samfélaginu á eigin forsendum, hafi einkarými og njóti friðhelgi á eigin heimili.