Um félagið

Ás styrktarfélag  er sjálfseignarstofnun og hefur í gegnum árin komið á fót umfangsmiklum rekstri. Þá hefur félagið notið velvilja og hafa einstaklingar, félagasamtök og fyrirtæki átt drjúgan þátt í að styðja félagið til vaxtar. Í dag veitir Ás styrktarfélag  hátt á þriðja hundrað manns þjónustu í formi búsetu, dagþjónustu og vinnu. Starfsmenn félagsins eru um. 212 í rúmlega 131 stöðugildi.

Í mars 2001 urðu tímamót í sögu félagsins þegar undirritaður var þjónustusamningur milli félagsmálaráðuneytisins, Svæðisskrifstofu málefna fatlaðra í Reykjavík og Áss styrktarfélags. Þessi samningur skiptir höfuðmáli fyrir rekstur félagsins. Von er bundin við að í framtíðinni geti félagið haldið áfram að stuðla að frekari uppbyggingu í málaflokknum með sjálfsaflafé sem það aflar af sölu happdrættismiða, jóla- og minningarkorta, gjöfum frá fyrirtækjum og styrktaraðilum, auk félagsgjalda frá félagsmönnum sem nú eru yfir 800 á skrá. Stuðningur við félagið er því mikilvægur til þess að það geti stuðlað að öflugu uppbyggingastarfi í málaflokknum.

Ás styrktarfélag er í góðu samstarfi við helstu þjónustuaðila. Meðal annars tekur það þátt í samstarfshópum Velferðasviðs Reykjavíkur um atvinnu- og búsetumál fatlaðra í Reykjavík. Félagið er aðili að og á fulltrúa hjá Landssamtökunum Þroskahjálp, Öryrkjabandalagi Íslands og stjórn Skálatúnsheimilisins og Fræðslu fyrir Fatlaða og Aðstandendur (FFA) en það er samstarfsteymi. Sjálfsbjargar og Styrktarfélags lamaðra og fatlaðra og Þroskahjálpar.