Ungt fólk í Evrópu

Ungmennaskipti

Mikilvægur liður í starfi Ás styrktarfélags  er að þróa nýjungar og skapa tengsl, meðal annars við aðrar þjóðir. Ungmennaskipti er einn liður í þeirri þróun hjá félaginu sem skapar jafnframt tækifæri fyrir ungt fólk til að kynnast öðrum í sambærilegri aðstöðu og þau eru sjálf og til að deila reynslu sinni.  

Ás styrktarfélag  tók þátt í tveimur verkefnum á vegum Landsskrifstofu Ungs fólks í Evrópu (Youth in Europe exchange) í júlí og september síðastliðinn.  Um var að ræða samstarfsverkefni á milli félagsins og Associazone Italiana Persone Down (AIPD)(internationalle@aipd.is) sem eru samtök fyrir fólk með Downs heilkenni á Ítalíu.

Fyrra verkefnið fólst í að 10 ítölsk ungmenni ásamt 4 hópstjórum dvöldu á Íslandi frá 18.-25. júlí. Í hlutverki gestgjafa fyrir hönd Styrktarfélags vangefinna voru 8 íslensk ungmenni ásamt hópstjórum. Gestirnir dvöldu í húsnæði Lækjaráss en sumarlokun var á staðnum á þessum tíma. Gestir og gestgjafar áttu góðan tíma saman hér á Ísland, náðu vel saman og var tungumálið engin fyrirstaða. Ýmislegt var gert til gamans sem íslensku þátttakendurnir skipulögðu ásamt hópstjórum og starfsfólki skrifstofu Styrktarfélagsins. Farið var í ýmsar skoðunarferðir, veitinga- og kaffihúsamenning könnuð auk þess sem sem skipulögð var  hópavinna um þætti er varðar atvinnu-,og búsetumál. Auk þess að ræða um sjálfræði og sjálfstæði. Lokahófið var vel skipulagt með karaokekeppni og grillveislu.

Seinna verkefnið hófst þegar hóparnir hittust aftur vikuna 26. sept. - 3. okt í Písa á Ítalíu

Þá fór ítalski hópurinn í hlutverk gestgjafans. Ferðin til Ítalíu tókst vel í alla staði og nutu báðir þátttakendur í báðum hópunum þess að hittast aftur. 

Markmiðið með báðum þessum verkefnum er m.a:

• Að efla sjálfstæði ungs fólks með Downs heilkenni og gefa því tækifæri til að ferðast og kynnast öðru ungu fólki með Downs heilkenni í Evrópu.  Að læra af reynslu hvers annars, kynnast aðstæðum og aðbúnaði í ólíkum löndum.
• Að þátttakendur auki við þekkingu sína á Evrópu og fái tækifæri til að kynnast nýju landi, menningu og þjóð.